المساعد الشخصي الرقمي

مشاهدة النسخة كاملة : المدرسة الحادية عشر الابتدائية بتبوك تكرم معلماتها على حساب الطلاب


صالح الشمري
26-06-09, 04:13 PM
مديرة المدرسة الحادية عشر الابتدائية تقوم بعمل حفل تكريم المعلمات على حساب طالبات الصف السادس بحجة عمل حفل تخريج وتفصيل ملابس التخرج ( الماجستير ) بمبلغ 50 ريال ولو تشوفونه ما يسوى 20 ريال

مشغل المها
26-06-09, 04:51 PM
أخوي صالح ..

ترى عادي والله ..
احنا بالثانوي دفعنا 130 حق عباية ووشاح تخرج
وعااااااااادي
كل المدارس كذا ..
لأن مالهم دخل (مدرسة حكومية) ..
والبنات اللي مايبغوا يدفعوا غابوا يوم الحفل وانتهت السالفة ..

وبالنسبة لعباية التخرج ..

احسبها معاي
* متر الساتان (المستخدم دايم بعبايات التخرج) ب10 ريال
تحتاج البنت مترين او 3 على حسب مقاسها ..
يعني 20 أو 30 ريال ..
ويطلع أجرة الخياطة 30 ريال أو 20 ريال ..
أشوفه مناسب جدا ....<< بحكم عملي ..

والله يعوضك خير اخوي
والحمد لله انك أهم شي فرحت قلب بنتك ولاكسرت بخاطرها
وأجرك على الله ..
تقبل مروري ..
أختك مشغل المها ..

براااقه
26-06-09, 05:03 PM
وش دراك انهم كرمو المعلمات ؟؟؟

شعلة الكون
26-06-09, 05:07 PM
8
8
وانتي يابرااقه مسويه محقق كونن :)
الي اشوفه كلام مشغل مها صحيح
مناسب
وعسى الله تفرح بنتك كمان وتشوفه حفل تخرجه بالجامعه

شمـــوخ الشمـــــال
26-06-09, 05:08 PM
بروووووووقه ايش هالسؤال ياخي عليكي طلعات غريبه
المهم ياخوي الفعل مثل ماقالت اختى مشغل المها الله يعوض عليك

:: أبو فيصل ::
26-06-09, 05:41 PM
الكلام هنا يقول :

حفل تكريم المعلمات ( المعلمات ) على حساب الطالبات ( الطالبات )

يعني حاولوا تركزوا شوي ...

لكن برضوه ياخوي ترا الخبر فيه لخبطه شوي بعذر الناس ما تفهمكـ
وشو اللي حفل تكريم المعلمات ... وبعدين حفل تخريج الطالبات ..!!

ركز شوي الله يرحم والديكـ عشان نفهمـ ...

والله يعيننا و يعينكـ

مشغل المها
26-06-09, 05:47 PM
أخوي
ترى بأي حفل تخرج من يوم احنا بالابتدائي الى الثانوية العامة
لاااااااااااازم يكرموا المعلمات
واخوي لاتتخيل فيه هدايا وأشياء
لا والله كلها شهادة تقدير قيمتها
(طباعة وحبر وورق وكل شي ) 3 ريال مو أكثر ..
الا من رحم ربي يعطوهم ورد أبو 15 ريال !! للمتميزات فقط ..

:: أبو فيصل ::
26-06-09, 07:24 PM
^
^
الصراحة رد مسكت ... رد محكور
مقدرش ارد عليه ... بس أنكشفتي على حقيقتكـ
طلعتي من معشر المعلمات اللي ياخذوا الخمسينات ولا يردوهاااش ..!!

فتى الدخل
26-06-09, 09:51 PM
طيب انت وش الي مزعلك خلي البنات على كيفهم يعني لازم اللقافة تجي عاد ,,,,,,,,,,,,,,, امزح معاااااك دعابة دعابة

براااقه
26-06-09, 10:33 PM
وانتي يابرااقه مسويه محقق كونن :)




بروووووووقه ايش هالسؤال ياخي عليكي طلعات غريبه




يووووومه انا سالت ماكفرت ...اكلتوني ...

اللي اقصده من سؤالي ..

وش دراه ان المدرسه كرمت المعلمات على حساب الطالبات ..
وش الدليل ...يعني بنته او اخته ..جت بدون عبايه التخرج ؟؟يعني ضحكو عليها اخذو الفلوس ولا جابو لها عبايه التخرج ...

مشغل المها
27-06-09, 01:19 AM
أخوي سوالف ليل ..
والله ضحكت من قلب ..
وترى كل هالفلسفة اللي تفلسفتها انا لسه بالجامعة !!!

أخوي صالح
والله ماقصدت أسكتك أو ردي (نذالة)
ماكان قصدي الا أوضح لك الوضع
يمكن هذي بنتك الأولى ..
وتأكد اني ما اعرفهم ولا اقرب لهم لا من بعيد ولا من قريب ..
وتقبل مروري

نادر وجودي
27-06-09, 01:29 AM
اللي أعرفه أن كل حفل ختامي تتكرم فية المعلمات

وطالبات أخر مرحلة سواء إبتدائي أو متوسط أو ثانوي

والطالبة فقط عليها عباية التخرج أما تكاليف الحفل الباقية
فلها ميزانية خاصة من المدرسة ........

دانة تبوك
27-06-09, 02:25 AM
انا اشوف الــ 50 مو حيل مبالغ فيه بالعكس

المهم بنتك جابت هالعبايه يعني عطوها والا لا !!!!!


أكيد اعطوها ...

وبالنسبة لتكريم المعلمات كل حفل يسوون لهم تكريم

بس لهم ميزاينة خاصه لهم وللحفل الي يسوونه المدرسه


بالتوفيق لبنتك ويارب عقبال الجامعه



تفرح بتخرجهااا



عواافي...

نسايم ليل
27-06-09, 11:26 AM
تصدقون اني تخرجت من الكليه

حتى عباية تخرج وحفل مافرحت فيهن


<<< خاشه عرض ههههه

RO7
27-06-09, 04:31 PM
8
مشكلهـ قسمن !!!!

صالح الشمري
27-06-09, 05:53 PM
توضيح ( براقـــــــــــــــــــــــــــــــــــــــــه )
قالت مديرة المدرسة في نهاية اجتماع الامهات نبي مشاركتكم معانا في احضار اي شي من الطعام والسلطات والحلويات في حفل تخرج الصف السادس وعند حضور الحفل لم تكرم ولا ام ولم تكرم ولا طالبه لتفوقها العملي او تكريم الموهوبات كل التكريم من المديرة للمعلمات ومن المعلمات للمديرة والامهات جالسين يتفرجون عكس المدرسه الثالثه عشر في حفل التخرج كرمو الامهات والطالبات ( وليس الهدف المبلغ 50 ريال) ما دفعنا الفلوس الا حنى متوقعين انهم يكرمونهم قعدو يكرمون بعض ونسو الناس الجالسه

براااقه
27-06-09, 09:00 PM
اها فهمت ..يعني قصدك انهم ماكرمو الا انفسهم ...

هذي السالفه اهون من السالفه االلي سوتها لنا المديره ايام اول ثانوي ..

في حفل الامهات اتفقو انهم يكومون المتفوقات في ماده الرياضيات ..ورتبو الحفل على انهم يكرمو البنات ..
ولما جت المساعده قالت لنا يلا انزلو للساحه عشان التكريم ..طلعت لنا المديره وقالت لو شفت واحده منكم تحت لاهزئها قدام الامهات لانكم مشاغبات وماتستاهلون ..:angry:
ومن حسن حظي اني انا ومجموعه من البنات ما كنا حاطين بروسنا انا ننزل لان امي ماحضرت الحفل وشفت ماله داعي الطلعه ...

يعني الوضع عندكم احسن بمليون مره من الوضع اللي عندنا ...

وفيه بعض المديرات خساااااره عليهم الكرسي اللي جالسه عليه ..:c1:

هـــ الشمال ـــاوي
27-06-09, 11:25 PM
صدور ضوابط الحفلات الختامية لمدارس البنات
* الرياض - جواهر الدهيم:
أصدر مدير عام التربية والتعليم د. إبراهيم بن محمد آل عبدالله قراراً بشأن الحفلات الختامية وذلك حرصاً على تحقيق الأهداف التعليمية والتربوية المنشورة في الحفلات المدرسية الختامية والمنعقدة لتكريم الطالبات المتفوقات في ختام العام الدراسي في مدارس التعليم العام والحكومية والأهلية على اختلاف مراحلها واستناداً إلى ما يرد بين الفينة والأخرى من ملاحظات حول هذه الحفلات.. وعليه فقد أعدت الإدارة العامة لتوجيه وإرشاد الطالبات الضوابط والتعليمات المنظمة لإقامة هذه الحفلات المدرسية والتي تنص على: عدم تكليف الطالبات بمطالب نقدية أو عينية، وعدم إلزام الطالبات بالحضور أو المشاركة في تقديم فقرات الحفل، بل تكون اختيارية لمن شاءت بوافقة ولي أمرها، ويتم دراسة برنامج الحفل التكريمي من قبل لجنة إشرافية مشكلة في المراكز الفرعية ويعتمد.وألا يشتمل البرنامج على أمور تخالف الشريعة أو تخالف الأنظمة أو التعليمات الصادرة بهذا الشأن (كالتبرج - التصوير - الموسيقى - التسجيل ودخول الرجال)، مع مراعاة التزام جميع الطالبات بالزي المحتشم خلال الحفل الختامي. وتشمل المشاركات في تقديم فقرات الحفل أن يوضع برنامج زمني منظم من قبل مراكز الإشراف الفرعية لحضور هذه الحفلات الختامية لمتابعتها وتقسيمها.

أتمنى لك ولأبنتك دوام التوفيق والنجاح
دمت بحفظ الرحمن .

صالح الشمري
28-06-09, 01:36 PM
هاوي الشمال يابعد حي على ها لمعلومات القيمة اشككرك من اعماق قلبي على هذا الرد
مع شكري وتقديري ،، لجميع المشاركين

مشغل المها
28-06-09, 02:02 PM
اهاااااااااااا

اثاري السالفة كذا !!!!

أحسب انكم مستكثرين ال50 على العباية
وتحسبون المدرسة سرقتها وكرمت المعلمات بهالمبلغ !!!