لمن أراد الأجر .. أسرة لاتجد قوت بيتها . . .

#1 23-06-2008, 06:52 PM

بسم الله الرحمن

السلام عليكم ورحمة الله وبركاته ...

أخواني الأعضاء ..

هذا الموضوع حدث معي صباح الأمس في مكتبي ...

فأحببت أن أطرحه بين يديكم ... من باب (( الدال على الخير كفاعله ))

أتيت في الصباح ككل يوم ...

وبينما أتأهب للبدء في يوم عمل جديد ..

وإذا بشاب يقف عند باب مكتبي ...

وضح متردداً ... يريد الدخول .. ولايريده

بداية لم أستغرب وجودهـ .. لكنه لفت نظري بحركاته

فعندما يهم بالدخول .. يتراجع عن ذلك

ذهبت وأحضرته كي أخدمه .. سألته (( ايش اقدر أخدمك فيه ))

سكت شوي ... وقال أبغى اكبر مسئول هنا ..

قلت له ايش موضوعك .. واعتبر انك وصلت

استغربت أسلوبه .. والطريقة التي حدثني بها ..

فهو لم يجلس إلا بعدما أصريت عليه بذلك .. لم يتحدث بموضوعه مباشرة .. أدخل يدية بجيبه

ثم ووضع بين يدي بعض الأوراق ..

بداية ً توقعت أنه يريد الإعتراض على خدمة .. أو يشتكي من شئ ماء .. لا أعلم ماهو

سألته .. ماهذه الأوراق

قال أفتحها وتشوف ..

رفضت أن افتح الأوراق .. وقلت له تأكد ياخوي أني مصدق بأي كلمة

وأذا عندك شكوى او شي .. منت طالع من هنا إلا وخاطرك طيب

قال لي عندي شكوى ... بس مااظن انك تخدمني فيها ..

قلت أعيد وأكرر لك منت طالع من هنا إلا وخاطرك طيب .. أنت آمر بس

وأنا بخدمك في حدود أستطاعتي ...

قال لي أنا أشتكي الزمن والظروف ..

جاء العامل يقدم الشاي له

ثم سكت .. قلت كمل ليش سكت

قال لي أنا أشتغل عندكم بدال العامل

أسوي شاي وقهوة .. وأنظف

مستعد أجي أول واحد .. وأروح آخر واحد ..

أكنس وأنظف ... وأسوي شاي وقهوة .. واللي تبيه بس أشتغل

ايش فيها .. الشغل مو عيب

على الأقل يفكك من سؤال الناس ..

ويخليني أصرف على أهلي ..

ظروفي صعبة ... ابوي متقاعد وعاجز عن العمل

ما نقدر على مصاريف علاجاته اللي ماتخلص

الضمان يصرف لنا 800 ريال

ومستأجرين بأكثر من هالمبلغ ..

وحنا عائله .. مكونة من أبوي وأمي وأنا وثلاث بنات

والله .. والله .. والله أنا نايمين كلنا بدون عشاء البارح

أحسست بنبرة حزن بصوته .. ممزوجه بقهر .. من قل الحاجة والحيلة

قمت من خلف مكتبي جلست مقابله .. قلت له هدي ..

وصلت خير .. أنا راح أشوف وضعك

أنا مصدقك .. بس أتأكد أول من كم شغلة ..

سألته ... أنت معك ثانوية ..
قال لا ..
قلت حلو ندور لك وظيفة بالكفاءة ..
قال ولا معي ابتدائية ..

ولاأقرأ ولاأكتب ..

كل اللي معي .. بطاقة أحوال فقط ..

انا مدري ايش اقول له .. مااقدر أوظفه بهالحالة

قال أنا عارف .. اني صعب اني القى وظيفة بدون شهادة

خصوصاً بهذا المكان

قلت طيب ايش اللي جابك هنا ...

قال ماادري .. مافيه مسئول مارحت له

مافيه محل مادورت فيه وظيفة

كلهم يطلبون شهادة .. وأنا يادوب أتهجى الكلام وأقرأ

الساعة الآن التاسعة .. وبدأ زملائي والمراجعين يأتوني في مكتبي لأنهاء المعاملات

ناديت أحد زملائي ممن يعملون بنفس القسم لدي .. قلت خذ الأخ معك ..

وأنا شوي وأجيكم .. بس اخلص اللي بيدي

كنت شارد الذهن ..

لفت انتباهي ببطاقة أحواله .. أنه من مواليد 1406

ومجموعة الأوراق التي كانت بحوزته .ز ماهي إلا مواعيد وجلسات علاج لوالديه وله ..

تخيلو شاب في عنفوان القوة والشباب .. عاجز عن العمل

بعد لحظات .. دخلت إلى المكتب الداخلي

قلت له .. ليش مادرست

قال لي هذه حالتنا من زمان ... والدراسة يبي لها مصاريف ..

أقولك ماتعشينا من البارح .. كيف يمدينا نشتري دفاتر وكتب .. ولوازم الدراسة

قال مو بس انا حتى أخواتي .. كلنا نفس الحكاية ..
مانعرف لانقرأ ولانكتب

واللي زاد الطين بله .. اني صدمت بالسيارة وصار معي أنحناء بالعمود الفقري .. وماأقدر أشتغل أي شغله فيها مجهود بدني قوي

قال له زميلي .. انت تقول هالكلام تبي مساعدة ..
وإلا ايش السالفة

قال لي .. ماعشت مكاني وإلا ماقلت هالكلام

وانا طلعت من البيت لما سألوني أهلي وين رايح ..

قلت لهم بروح اجيب فطور .. وأنا والله مدري من وين

قلت الأمور هذه مقدور عليها ... لاتاكل هم

المهم .. طلبت من زميلي يتركني لحالي معه ..

لأني ماحبيت أحد يشكك بكلامه .. وأنا متعود أعامل الناس بظواهر أمورهم

اللي قدرت عليه .. سويته له

وأخذت وصف البيت منه .. ووعدته خير

قلت له وظيفة راح اسعى لك فيها .. بس صعب شوي في مثل حالتك

عرضت عليه أنه يدرس رخصة عمومي .. ومالك علاقة بأية مصاريف

قال لي أنا مااعرف أسوق أصلاً .. قلت له ماعليك تتعلم

أعطيته رقم جوالي .. وقلت العرض ساري معك .. وأتصل فيني بأي وقت
أعتذرت منه لأني ماقدرت أقدم له شي ..

قالي شكراً .. وربي اللي سويته معي أكبر كثير من اللي سواه معي أكبر مسئول رحت له ..

هذا ماحدث معي أنا وذلك الشخص ...

لمحبي الخير .. ولأصحاب القلوب الرحيمة

ولمن أراد الأجر ... فهذه الأسرة محتاجه

لاتستهينوا بالقليل .. فهم يرونه كثيراً

والرسول قال (( تصدقوا ولو بشق تمره ))

من أراد عنوان المنزل ورقم الهاتف لهذه الأسرة ... فليراسلني على الخاص ..

والله من وراء القصد

23-06-2008, 08:02 PM

[overline]تم التعديل

وأعتذر عن أسلوبي في الكتابه ... لأنه من اصعب المواقف اللي مر علي
[/overline]

23-06-2008, 08:19 PM

اول شي اخوي شمالي الله يجزاك خير

وقليل الي مثلك والله وانت ما قصرت معه وانا بالنسبه لي الي اقدر اسويه له

انشاء الله اني مراح اقصر معه وكل هذا لوجه الله

ونشاء الله انها تنحل مشكلته يارب

فعلا سالفه محزنه

وجزاك الله خير الجزاء اخوي شمالي

23-06-2008, 08:21 PM

لا إله إلا الله ..

ودام اني اعرفك يالشمالي انشالله بيننا اتصال مطووول ..

والله يعطيك العافية والله يعين هالشخص على ظروفه ..

يا الله لو كنا بمكانه .. لا حول ولا قوة الا بالله ..

زمنا زمان الانانيه .. حسبي الله عليهم هاللي تسببوا بحال هالأسرة ..

23-06-2008, 09:12 PM

لا حول ولا قوة إلا بالله

سبحان الله حنا عايشين برفاهية ولاندري عن بعض الناس كيف عايشين

الله يرزق هالشاب بوظيفه عاجلاً غير آجل

أرجوكـ أخوي شمالي

أرسل لي عنوان بيتهم عالخاص لو سمحت

23-06-2008, 09:14 PM

شمالي .. الله يجزاك خير ويكثر من امثالك

لا تخاف الخير باقي بإذن الله

23-06-2008, 09:49 PM

والله حزنت على هالاسره .........

بعض الناس تاكل ونص اكلهم للزباله (وانتم بكرامه )ولاهم حاسين بالناس اللي ما تلقى لقمة العيش

بس الحمدلله لسه الدنيا بخير والله يكون بعونهم ويرزقهم من حيث لا يحتسبوا........

ومشكور شمالي والله يكثر من امثالك والله يجزاك الف خير ..........